Қазақстан Республикасының Президенті Қасым-Жомарт Тоқаевтың 2025 жылғы 8 қыркүйектегі Жолдауында білім беру саласын дамытуға ерекше назар аударуы – бұл елдің болашағына жасалған стратегиялық қадам. Мемлекет басшысының "Жасанды интеллектімен жұмыс істеу құзіретін қалыптастыру мектеп қабырғасынан қолға алынуға тиіс" деген нақты тапсырмасы Қазақстанның әлемдік цифрлық кеңістіктегі бәсекеге қабілеттілігін арттыруға деген ұмтылысын көрсетеді.
Жолдауда атап көрсетілгендей, цифрлық технологиялар жаһандық еңбек нарығын жылдам өзгертіп жатыр, сондықтан жасанды интеллект (ЖИ) саласында білімді және дағдыны меңгерген мамандарға деген сұраныс артып келеді. Осыған орай, ЖИ-ды мектеп бағдарламаларына енгізу – қазіргі жастарды болашақтың талаптарына дайындаудың тиімді жолы. Бұл бастама тек оқушыларға ғана емес, сонымен қатар ұстаздардың біліктілігін арттыруға да бағытталған. Мұғалімдердің заманауи технологияларды меңгеруі – білім беру сапасын көтерудің негізгі шарттарының бірі. Президенттің Жолдаудағы ең маңызды бастамаларының бірі – "Qazaq Digital Mektebi" атты шағын жинақты мектептерге арналған модельді әзірлеу. Бұл жоба қашықтан оқыту мен жасанды интеллект технологияларын біріктіру арқылы ауыл оқушыларын сапалы біліммен қамтамасыз етеді. Бұл бастама білім беру саласындағы теңсіздікті жоюға және әрбір балаға тұрғылықты жеріне қарамастан, заманауи білім алуға мүмкіндік береді.
Сонымен қатар, балаларды дамыту орталықтарын салуға жеке капиталды тарту тәжірибесін бүкіл елге тарату туралы тапсырмасы – білім беру саласына мемлекеттік-жекеменшік серіктестіктің жаңа әрі тиімді үлгісін енгізудің белгісі.
Қорытындылай келе, Президент Жолдауында білім беру саласындағы проблемаларға нақты шешімдер ұсынылған. Бұл бастамалар білім беру сапасын арттыруға, жасанды интеллект дәуірінің талаптарына сай келетін мамандарды дайындауға және ауыл мен қала арасындағы білім алшақтығын жоюға бағытталған. Бұл міндеттерді табысты іске асыру – Қазақстанды білімге негізделген және цифрлық дамыған мемлекетке айналдырудың негізгі кепілі.
